Bir qrup gəncin təşəbbüsü ilə «Beynəlxalq İnformasiya və Tədqiqatlar İnstitutu» İctimai Birliyinin təsis konfransını keçirib.
Aprelin 20-də Azərbaycanın bir qrup vətənpərvər gənci «Beynəlxalq İnformasiya və Tədqiqatlar İnstitutu» İctimai Birliyinin (International Information and Research Institute) təsis konfransını keçirib.
Gemi.az-ın verdiyi məlumata görə, bu haqda məlumatı qurumun sədri Zaur Qəriboğlu verib. Zaur Qəriboğlu BİTİ haqqında məlumat verərək bildirib ki, bu gün dünyada, əsasən də müharibə və münaqişə ocaqlarında baş verənlər haqda oxucuya və beynəlxalq ictimaiyyətə dolğun, dəqiq və qərəzsiz informasiyaların hazırlanmasına və yayılmasına ehtiyac var.
Azərbaycanın Ermənistan Hərbi Birləşmələri tərəfindən işğal edilən torpaqlarında son 25 il ərzində, eləcə də son bir ayda baş verənlər göstərdi ki, informasiya müharibəsində fəallığın gücləndirilməsinə və qələbəyə zərurət var. Bunun üçün də regionda və ölkədə baş verən proseslərlə bağlı, eləcə də hərbi hücümlar haqqında araşdırma-təhlillərin aparılması, mövcud vəziyyətlə bağlı hesabatların hazırlanması, eləcə də bunu müxtəlif istiqamətlərdə inkişaf etdirilməsini təmin etmək məqsədilə «Beynəlxalq İnformasiya və Tədqiqqatlar İnstitutu» İctimai Birliyi təsis edilib. O qeyd edib ki, Birliyin fəaliyyətinin əsas istiqamətlərinə dünyada bu gün fəaliyyət göstərməkdə olan araşdırma mərkəzləri, beyin quruluşları, aparıcı media qurumları və fondlarla sıx əməkdaşlıq etmək, regionun geosiyasi maraqlarına uyğun olaraq ölkəmizin dünyada artan nüfuzunun tədqiqi ilə bağlı “dəyirmi masa”lar, elmi-praktik konfranslar, simpoziumlar, forumlar, o cümlədən, beynəlxalq miqyaslı tədbirləri təşkil etmək, dünyanın müxtəlif bölgələrində mövcud vəziyyəti analiz etmək, dünyadakı münaqişə ocaqları, regional və təhlükəsizliyi ilə bağlı tədqiqatlar aparmaq və nəticəni KİV vasitəsi ilə ictimaiyyətə çatdırmaq, gənc araşdırmaçılar üçün dünyanın aparıcı tədqiqat mərkəzlərinin iştirakı ilə birgə təcrübə kurslarının təşkil etmək, dövlət, qeyri-hökumət təşkilatları və beynəlxalq qurumlarla əməkdaşlıq, jurnalistlər üçün informasiya bankının yaradılması, regionda baş verən münaqişə ocaqlarının araşdırılması, mövcud vəziyyətdən optimal çıxış yolları barəsində obyektiv, qərəzsiz təhlillərin aparılması və bu təhlillərin ictimaiyyətə çatdırılması məqsədi ilə Birlik üzvlərindən ibarət xüsusi analitik qrupun təşkil edilməsi, regionda insan hüquq və azadlıqlarının təmini yönündə araşdırmaların aparılması və müvafiq olaraq xüsusi hesabatların hazırlanmasıdır: “Dünyada gedən informasiya müharibəsində ölkəmizin haqq səsinin beynəlxalq ictimaiyyətə çatdırılması yönündə intensiv fəaliyyətin göstərilməsi, bu yöndə müxtəlif beynəlxalq təşkilatlarla əməkdaşlığın qurulması yönündə fəaliyyət göstərəcəyik”-, deyə o, bildirib.